يوسف و توةَ 5

23 septembre, 2007 par Adam Bouhadma, dans Humour, Youssef Benaadi. 10 commentaires

اولا … ما تقراوش هاد لبوست يلا كنتو صايمين … حيت خاصكوم تحطو حداكوم شي كاس تاع لما … باش يلا ماتسرطاتش ليكوم شي حاجة … تعاونو بيه ( لما) … ما تكًولوش ما علمتكمش !

كَاليك الصيام هو الإمساك عن شهوتي البطن و الفرج من طلوع الفجر إلى غروب الشمس … ياك متافقين ؟

حيت انا هير تاتزوك زواكا … تانرجع للعادات ديالي الطبيعية … السرية منها ولي بلعلالي !

باش نكونو مفاهمين … انا ماشي من عبدة لحريرة … زعما راني ماكنتش تانصلي … وماتانصليش … و مازال ما فكرت يمتا غادي نصلي … حتال 2015 ويبان ليا لبلان … ورمضان لا يشكل إستتناء

انا فرمضان تانصوم صافي … يعني لوستريكت مينيموم … كيما تايكَولو النصارى … ولا اضعف لإيمان … يلا بغيتو

فكرتوني بعدا … انا قبل مايبدا رمضان تقديت عرام ديال لافلام باش ندوز لوقت … حيت بيني وبينكوم … فهاد الشهر الكريم تانقاطع دوزيم و رباط … زعما الاولى … وبلا مانكَوليكوم علاش … كولشي عارف !

ومن كولشي هادشي، فين وصلتي معا توةَ ؟

واماكوم زربانين … درت ديك لمقدمة باش نرطبكوم شويا … دابا غادي ندوزو لمعقول

واحد النصيحة في وجه الله … جيبو شي قرعة ديال لما تكون كبيرا شويا … حيت هاد لمرة تقدر توحل ليكوم نيت بصاح

بغيتو نهضر ليكوم علا توة ؟ … مايكون هير خاطركوم … اجيو بعدا … ماعمرني وصفت ليكوم توة كي دايرة بتفصيل … علاش مانبداوش بيها هيا لولا ؟

توة شهبا … والاكين ماشي شي شهوبية نيت عوتاني … نكَولو كَاع 8/10 … عينيها زرقين … ماعرفتش نيت واش بصاح ولا دايرا شي لونتي … بعدا جات معاها زروقيا … غادي يكون فيها ديك 1م70 … اما لوزن ولله ماعرفت … بعدا راها تقيلا شويا من لكبش لي شرينا فلعيد لي فات … حيت هزيتها فاش كنا ف اكَادير اوفلا (ماكَلتهاش ليكوم ؟) … يقدر يكون فيها ديك 55 كلغ !

توة تاتلبس حوايج فيهوم لحمر وزرق … لوان لمفضلين عندها … وتادير لشعرها باندا فيها واحد لفريزا فلوسط ! …

توة تاع بصاح وخلاص !

بعد هاد لمقدمات بجوج … غادي نعاود ليكوم آشنو لجاديد فلحكاية ديالي معا توةَ.

نهار لخميس … عيطات ليا توة فتليفون … عقلتو فاش كَلت ليكوم راه هيا لي غادي تولي تعيط ليا ؟

ـ الو يوسف !

ـ الو توة !

ـ باش عرفتي واش انا ؟ زعما درت رقم بريفي (خاص)

ـ علاه شحال من وحدا تانعرف صوتها زوين بحال ديالك !

ـ هههههه

ضحكي معا راسك ا لالة … من حقك

ـ إوا نتا لاباس ا حبيبي ؟

ـ سمعو ا عباد لله … حبيبي … انا مووت بخير

ـ بخير، ونتي آش تاتعاودي ؟

ـ توحشتك

صافي صافي … الدريا مشات … لعبا تاع اكَادير اوفلا صدقات … خوكوم سعيد بزاف !

ـ حتا انا آلحبيبا ديالي … والاكين زعما يالله تفارقنا

نسيت ماكَلت ليكوم … راه تانقرا انا وتوةَ فنفس ليسي … داكشي علاش كنت تا نطلع ونزل باش نتاقل من ليسي لقديم …

وليت تا نوصلها لدارهوم فسكوتر ديالي… يلا خرجنا فوقت وحدا … حيت هيا تاتقرا فقسم آخر !

ـ ما كرهتكش تكون ديما معايا !

تا انا اودي ما كرهتش لي يونسني … لأغلبية ديال لوقت تانكون بوحدي فدار … حيت ماتانرتاحش عند خالتي … والاكين آش غادي دير … زواج حنا مازال صغار عليه

ـ وقت ما بغيتي دوزي، الدار دارك

ماتخافوش … الشيخ غادي ندور معاه … باش مايبرزتنيش !

ـ آش ظهر ليك فشي فطور نهار السبت ؟

ـ كيفاش زعما نفطرو بجوج عندي فدار

ـ آه، كاين شي مانع ؟

ـ لا، نو بروبليم ! مايكون هير خاطرك ا توةَ ديالي !

معا خوكوم قاتلو لعكَز … درت معا واحد سيدا باش توجد ليا شي فطور ما تايدورش … وباش تجمع شويا الدار … حيت انا

فوضوي … لا ماش الفوضوية ديال دنييل كَران … زعما لانارشيزم … الفوضوية ديالي بوحدها

لموهيم … حتالمرة لخرا ونكمليكوم هاد لحكاية لمروْنة !

بغيت نشاوركوم فواحد لقضية … زعما هاد توة ما تقدرش تخرج ليا علا قرايتي ؟ … حيت خفت نصدق مصيد بحال شي بعضين … ماتعرف لوقت اش تجيب … واخا لوقت هير وحدة قياس !

يوسف بنعدي

 

Billet posté par Zakaria (écrit par Adamito!)

يوسف و توةَ 2

9 août, 2007 par Adam Bouhadma, dans Youssef Benaadi. 11 commentaires

 Vous pouvez lire le premier épisode de Youssef wa Touta

فين كنا واصلين ؟ … آه، مشيت انا و توةَ حدا لما … دابا نشوفو هاد لبحر واش تا يهضر نيت

 

ـ وا ش لبحر يقدر يهضر معايا تا انا ؟
ـ  معرفتش ! يلا بغا

هاد لبحر تا يتشرط عليا ولا شنو … لهلا يبغيه … اش غادي يڭول ليا ڭاع بسلامة

 

ـ ما ڭلتيش ليا واش نتي فيك سيدا اولا لا ؟
ـ لا ما فياش ! ما جات بابا سيدا حتا تولدت انا

 

وا فلتي ا توةَ … عجبتني عندها هاد ” جات بابا سيدا ” … بحال يلا لقاها ف باكية دبونيكس … عرفتو اش غادي ندير ؟ غادي نقلب لموضوع تاني … سيدا تاتجيب ليا تبوريشا

 

ـ واخا نبقا نڭول ليك توةَ
ـ يه، والاكين علاه احلام ما عجباتكش ؟

 

توةَ زعمات، ولات تا تسول … مابقاتش تا تحشم … دابا خاسني نلقا ليها شي جواب لاسق

 

ـ احلام زوينا و رومانسيا، هير هوا توةَ جات معاك حسن
ـ سميني لي حبات خاطرك

 

لقاضيا ولا فيه لحب ڭاع … اش بينا و بين شي حب … انا لحب خليتو ل ماليه … وزايدون لحب فيه صداع … و خوكوم ما قاد عليه

 

ـ مالك ساكتا، واش تا يهضر معاك لبحر ؟
ـ آه، تيهضر ليا عليك
ـ اشنو تا يڭول ؟
ـ ڭاليك لحب يلا عرفتي ليه ما تا يكونو فيه مشاكيل

 

تسليم … طلبو تسليم يا ناس … هاد توةَ ماشي عاديا … ڭلتها ليكوم ولا لا ؟ … وا هادي فاتت شوافات لديك جيه … تسليم

 

ـ وزعما لبحر يقدر يعلمني ؟
ـ يه، هير خاصك تحل ودنيك مزيان حيت هاد لهضرا ما تتعود
ـ واخا ا توةَ، هاني سميع مطيع
ـ ڭاليك لبحر ما تبقاش تزرب
ـ كيفاش ؟ شي مثال
ـ بحال يلا بانت ليك شي توةَ ف لكورنيش، ما تفكرش ديريت ف لحب تسنا شويا

 

واش حشيان لهضرَ بلعلالي هادا … هاد لبحر تيضرب عليا لمعاني ولا شنو ؟ … ما عليناش … في سبيل لإستفادة و صافي

ـ اشنو مزال ؟
ـ ڭاليك لبحر، يلا شفتي شي دريا عاجباك كون معاها عادي ف لوّل و ما تبين ليها والو

 

اودي راه هادشي كولشي عارفو …والاكين هير تاتبغي تهضر معا شي وحدا عاجباك تا يتخلط ليك شعبان معا رمضان … هاد لبحر عندو معا شفاوي بزاف

 

ـ و من بعد ؟
ـ ڭاليك خاصك تختار شي وحدا تا تبغي بعدا تخرج معا دراري بعدا

 

هادي كاينا … كاينين شي درِّيات تا يسمعو بزاف لعمر خالد و يخوانه

 

ـ مزيان هادشي مفيد ! كاين شي نصيحة خرا ؟
ـ لا صافي

 

حسن نيت، هاد لبحر بدا تا ينفخ ليا ف راسي

 

ـ توةَ
ـ نعام
ـ بغيت نشوفك مرا خرا، تعطيني نمرا ديالك ؟
ـ واخا

 

توةَ عطاتني نمرا ديالها … ما تخافوش راه ما دارتش ليا لعبا ديال نمرا غالاط

 

هاد لحكايا باقي طويلة … تا نعاود نرجع و نكمل ليكوم
هير واحد لحاجا بغيت نڭولها … خوكوم ناوي لمعقول

 

عندكوم شي رجلين ؟ … وا تبع

 

يوسف بنعدي

يوسف و توةَ1 (darija)

6 août, 2007 par Adam Bouhadma, dans Youssef Benaadi. 10 commentaires

Merci de lire ce billet au second degrés

كنت تا نتمشا ف لاكورنيش بوحدي … بانت ليا واحد لبنت يمكن القول بأنها توةَ … والاكين هادي ماشي بحال دوك توتات لي تا نشوفو ف لبحر ولا ف نايت كلوب … هادي مختلفا

قبل ما نمشي عندها، بقيت مقابلها باش نعرف واش بوحدها … عاد مشيت و سلمت عليها

ـ انا سميتي يوسف، و نتي ؟

ـ احلام

الله، حتا سّميا ديالها رومانسية … بقيت شحال وأنا تانشوف فيها … توةَ تاع بصاح

ـ مالك حشمانا ؟

…

ـ معامن جيتي ؟

ـ تا نسنا واحد صاحبتي، دابا تجي.

ـ عمر ڭاليك شي واحد نتي توةَ
…

ـ هضري، راني ماتانعضش

ـ بابا كان تيڭولها ليا

ـ مالو ما بقاش تايڭولها ليك ؟

ـ مات

تفكرت ديك ساع انا لواليد ديالي تاهوا مات، ولكن ماعرفتش واش نڭولها ليها و لا نسكت

ـ حتى انا

ـ اشنو ؟

ـ حتى انا لواليد مات

بقينا تانفكرو بجوج … تا واحد فينا ما قدر يهضر

ـ انا حتى لواليدا ماتت، و نتي ؟

ـ ماما باقيا، ولكن مريضا بزاف

ـ صافي ما تبكيش أ تُّوةَ، ماماك غادي تبرا

ـ لا، ما يمكنش تبرا حيت فيها

ـ اشنو ؟ هير هضري ما تخافيش

ـ ماما فيها سيدا

ما عرفتش آش نڭول … نشف ليا فمي … سيدا ؟ ما يمكنش … اش بني و بين شي توةْ ڭاع ؟
انا بغيت نعيش مازال … جو سوي جون

ـ كولنا غادي نموتو واحد نهار، صافي ما تبكيش

ڭلت معا راسي اني خاصني نڭلب لموضوع

ـ تايعجبك لبحر ؟

ـ بزاف، هوا لي تايفهمني

ناري؛ هاد توةَ عندها معا شِّعر … غادي ندير راسي شويا كامبو

ـ علاه لبحر تايفهم ؟

ـ يه، و تايهضر معايا بعض لمرات

لالا، هادي طار ليها لفريخ ! فين عمر لبحر هضر ؟ لله يستر و صافي

ـ واش تا يعجبك اخور ؟

ـ تانبغي نكتب

صافي كملات لباهية ! ڭلت ليكوم هادي ماشي بحال توتات لاخرين … كنت تنسناها تڭول لي  » تانبغي نتفرج ف الأفلام لمصرية ولا ستار اكادمي … لله يدوز هاد نهار بخير

ـ واشنو تايعجبك تكتبي ؟

ـ رواية و شِعْر

ـ علا آش من موضوع ؟

ـ لبحر ولموج

وا مال هادي معا لبحر ؟ … يمكن واكلا شي حاجا … يوسف ما تعيقش

ـ باش تا تكتبي لعربيا ولا لفرونسي ؟

ـ فرونسي و بعد لمرات لعربيا

ـ مزيان، بغيتي نمشيو حدا لما ؟

ـ و صاحبتي ؟

ـ يلا جات غادي تعيط ليك ف تيليفون، هير اجي

إوا ما عندي ما ندير … غادي نتبع هاد توةَ ف لهبال ديالها … نهضرو معا لبحر … ونشوفو واش تايفهم بصاح نيت
لموهيم تا نعاود نرجع و نكمل ليكوم لحكاية ديلي معا هاد توةَ

يتبع

يوسف بنعدي

النفاق الإجتماعي

5 août, 2007 par Adam Bouhadma, dans Youssef Benaadi. 9 commentaires

 

النفاق الإجتماعي مصطلح كتشفتو شي ثلتسنين هادي انا و صاحبي ياسين. كان بنسبة لينا مفهوم عميق تا واحد ما عارفو

 

anticonformistes هاد لمصطلح تايعني ڭاع داكشي لي كنا تا نديرو باش نبانو نورمال واخا كنا

 

.مثلا فاش تايڭول لينا لوستاد ديرو شي إنشاء علا فلسطين، كنا تانكتبو ليه داكشي لي بغا، واخا ما متافقينش معاه

 

مثال آخور: فاش تا نكونو ف ل كور ديال لإسلاميات تنڭولو لأُستاذ هير لي بغا ( الكفار خايبين، السلام عليكم و رحمة الله تعالى و بركاته، محمد صلى الله عليه وسلم، استغفر الله) ولا تانجيبو ليه بحوث علا الإعجاز العلمي في القرآن ( لي عجبني فيهوم هوا ديال دبانا، واحد جنح ديالها مسموم و واحد فيه دوا

 

لمشكلا اناني مازال خدام ب هاد نفاق …قليل بنادم لي غادي يقبل لأفكار ديالي بلا ما يتبدل معايا … ما كرهتش نكون ديريكت معا بنادم والاكين خوكوم ما قاد علا صداع

 

لفاهم يفهم

يوسف بنعدي