يوسف و توة 6

3 octobre, 2007 par Adam Bouhadma, dans Humour. 18 commentaires

بلا مانعاود لهضرة ديال داك نهار … لي صايم يمشي يبدل ساعا بخرى حتال مورا لفطور … ولي ما صايم يكَول بسم لله ويبدا !

موهيم لهضرا فراسكم … توة غادي تجي تفطر معايا فدار … كولشي واجد … حتا لافلام فاش غادي نتفرجو.

ما شيري كَالت ليا غادي تجي 30 دقيقة قبل الآذان … المشكل لي كان عندي هو آش غادي نلبس … واش فوقيا بيضا … ولا شورت و تيشورت … عيييت مانفكر فلأخير … لبستهوم كاملين

داق داق … زعما دقان فلباب !

ـ شكون !

ـ قريب !

نزلت حليت … توة جابت معاها شي حاجة … ماتكون هير شي شهيوا ميد إن توتلاند ! (صنعت في توتلاندا !)

ـ مالك عدبتي راسك ؟

ـ راه هير شويا ديال لبسطيلا صايباتها ماما !

كنت تانهضر فلخوا لخاوي معا توة … وهوا يدق واحد لمسكين بغا لفطور … وانا نزل ليه واحد لبلاتو فيه شويا شويا من لحاجة.

ـ شحال سخي معا راسك

ـ اودي داكشي في سبيل الشعب وصافي !

درت لفيلم ماروك … حيت توة ماتفرجاتش فيه

… من بعد عنقنا جبابن ديال لحريرة بنوعيها وعطينها لعضان فلمسمن و رغايف …… وذن المغرب

لبيضا و لحمرا

قبل ما ندخل للب لموضوع … زعما لمعقول … بغيت نفكركوم فواحد لقاضية موهيمة بزاف … ولي هيا اللاشعور.

حيت كَالينا سي فرويد … واحد الراجل ماكان عندو مايدار … انه اللاشعور هو لي تايتحكم فبنادم … هادشي تقريبان لي كنت فهمت من الدرس تاع لفلسفة … يعني ان فلاغلبية ديال لوقت راه اللاوعي ديالي لي خدام … خصوصا فاش تاتكون معايا شي دريا … حيت تانطفي لأنا الأعلى ديالي* … فبتالي ماتلومونيش يلا درت شي حاجا ماشي هيا هاديك

* لي مافهم والو، يمشي يراجع علم النفس لفرويدي

ـ إوا، كي جاك هاد ماروك

ـ ولاه إلا قصة زوينا. هاد لبنات هوما لي عبرو، لارمضان لا والو. هناو راسهوم

هادوك الالة بوكو فلوس … اما ولد شعب الا حصل تايقصي فرمضان … غادي يدوز 6 شهور فلبنيقة

ـ آشنو لي حابسك باش ما ديريش بحالهوم ؟

ـ بغيتي نقتل ماما بلفقسا ؟ نخليها بعدا تاتموت وندير مابغيت

من حقك … هير حضي راسك … ماتعرفي دقا منين تجيك

ـ واشنو ضهر ليك فديك لعلاقة بين ليهودي و لمسلمة ؟

ـ ياك بجوج بنادم ومغاربة ملفوق، انا مابان لياش لفرق بينهوم وبينا بجوج مثلا

اعارضك في الرأي … هو ضارب علينا طونوبيل و تجاكيتات تاع الجلد … واهير الدار ديالهوم لي حدا لبحر … حسن من هاد الدار فاش كاينين دابا !

ـ ما متافقش معاك، هوما من طبقة خرا لاعلاقة معا ديالنا !

ـ وا لا، بغيت نكَول انهم حِبان بحالنا !

شحال هادي ماسمعت هاد لكلمة … حبان، زوينا … والاكين راه هوما مشاو بعيد فتالحبانيت** ديالهوم … دارو كَاع نونو فلحفيرا كيما كَالت واحد لممثلة

كلمة حبان بعد تشليحها **

ـ فعلا، عندك الصح. والاكين راه هوما دارو شي حوايج لي حنا مازاااال ماوصلناهوم !

ـ يوا راه هير ظروف لي ماسمحاتش لينا وصافي.

ـ كيفاش زعما، نتي متافقا ؟

ـ بيانسور.

ـ واش ناهوما هاد ظروف علاش هضرتي قبل ؟

ـ خصنا بعدا نكونو بجوج فدار عندك مثلا

ـ يوا علا هاد لقبل آش تانتسناو ؟

مالكوم عاوتاني ؟ … وازعما بغيت نضرب لحديد ماحدو سخون … كيفاش ؟ … حرام ؟

هاحنا رجعنا تاني لداكشي تاع … حرام، مكروه، مستحب، كبائر، صغائر … وزايدون، كيما كَالو هوبا هوبا سبيريت : خليني نعيش حياتي، وحسابي معا ربي … زيدو هادي عندكوم تاهيا … و خلِوْني نكمل هاد شغل بلا تبرزيت

ـ لا ليوما مايمكنش، جي مي غيكَل !

علا زهر عندك اعباس … هاد لليلة كنتي غادي تْعِيِّد … والاكين منحوس

ـ ياك دايرا بعدا اُلويز

ـ آه

ـ بجناح ولا بلاجناح ؟

ـ بجناح

ـ يوا مزيان !

حسن تبقاي ديما دايراه … باش يلا شي مرا فقستيني … ولحتك من سرجم … تفرفري شيوا !

بعد مدة لايستهان بها … من البوسان … ( او ما يسميه البعض العضان … من فعل عض يعض عضا … أي تَشَلْقَمَ، وهو فعلٌ ممنوعٌ من الصرف لأنهُ على وزن تَفعَّلَ )… اكلنا طبقَ البسطيلة المُعَمَّرَ بلحم البَطِّ الهندي … الذي كان مووت لذيذ !

شفتو خوكوم مجهد فالعربية !

يوا هذا ما كان … حتال مرة خرى يلا بغا لله

يوسف بنعدي

الجزء الأول … إنتهى

———————

ستعود حكايات يوسف و توةَ في جزءها الثاني بعد فترة من الراحة البيولوجية

تنتمنى أن هاد 6 ديال لحلقات يكونو عجبوكوم، ولي فيكوم عندو شي ملاحظة مرحبا بيه، وشكرا

كتبه : آدم بوهدما

يوسف و توةَ 5

23 septembre, 2007 par Adam Bouhadma, dans Humour, Youssef Benaadi. 10 commentaires

اولا … ما تقراوش هاد لبوست يلا كنتو صايمين … حيت خاصكوم تحطو حداكوم شي كاس تاع لما … باش يلا ماتسرطاتش ليكوم شي حاجة … تعاونو بيه ( لما) … ما تكًولوش ما علمتكمش !

كَاليك الصيام هو الإمساك عن شهوتي البطن و الفرج من طلوع الفجر إلى غروب الشمس … ياك متافقين ؟

حيت انا هير تاتزوك زواكا … تانرجع للعادات ديالي الطبيعية … السرية منها ولي بلعلالي !

باش نكونو مفاهمين … انا ماشي من عبدة لحريرة … زعما راني ماكنتش تانصلي … وماتانصليش … و مازال ما فكرت يمتا غادي نصلي … حتال 2015 ويبان ليا لبلان … ورمضان لا يشكل إستتناء

انا فرمضان تانصوم صافي … يعني لوستريكت مينيموم … كيما تايكَولو النصارى … ولا اضعف لإيمان … يلا بغيتو

فكرتوني بعدا … انا قبل مايبدا رمضان تقديت عرام ديال لافلام باش ندوز لوقت … حيت بيني وبينكوم … فهاد الشهر الكريم تانقاطع دوزيم و رباط … زعما الاولى … وبلا مانكَوليكوم علاش … كولشي عارف !

ومن كولشي هادشي، فين وصلتي معا توةَ ؟

واماكوم زربانين … درت ديك لمقدمة باش نرطبكوم شويا … دابا غادي ندوزو لمعقول

واحد النصيحة في وجه الله … جيبو شي قرعة ديال لما تكون كبيرا شويا … حيت هاد لمرة تقدر توحل ليكوم نيت بصاح

بغيتو نهضر ليكوم علا توة ؟ … مايكون هير خاطركوم … اجيو بعدا … ماعمرني وصفت ليكوم توة كي دايرة بتفصيل … علاش مانبداوش بيها هيا لولا ؟

توة شهبا … والاكين ماشي شي شهوبية نيت عوتاني … نكَولو كَاع 8/10 … عينيها زرقين … ماعرفتش نيت واش بصاح ولا دايرا شي لونتي … بعدا جات معاها زروقيا … غادي يكون فيها ديك 1م70 … اما لوزن ولله ماعرفت … بعدا راها تقيلا شويا من لكبش لي شرينا فلعيد لي فات … حيت هزيتها فاش كنا ف اكَادير اوفلا (ماكَلتهاش ليكوم ؟) … يقدر يكون فيها ديك 55 كلغ !

توة تاتلبس حوايج فيهوم لحمر وزرق … لوان لمفضلين عندها … وتادير لشعرها باندا فيها واحد لفريزا فلوسط ! …

توة تاع بصاح وخلاص !

بعد هاد لمقدمات بجوج … غادي نعاود ليكوم آشنو لجاديد فلحكاية ديالي معا توةَ.

نهار لخميس … عيطات ليا توة فتليفون … عقلتو فاش كَلت ليكوم راه هيا لي غادي تولي تعيط ليا ؟

ـ الو يوسف !

ـ الو توة !

ـ باش عرفتي واش انا ؟ زعما درت رقم بريفي (خاص)

ـ علاه شحال من وحدا تانعرف صوتها زوين بحال ديالك !

ـ هههههه

ضحكي معا راسك ا لالة … من حقك

ـ إوا نتا لاباس ا حبيبي ؟

ـ سمعو ا عباد لله … حبيبي … انا مووت بخير

ـ بخير، ونتي آش تاتعاودي ؟

ـ توحشتك

صافي صافي … الدريا مشات … لعبا تاع اكَادير اوفلا صدقات … خوكوم سعيد بزاف !

ـ حتا انا آلحبيبا ديالي … والاكين زعما يالله تفارقنا

نسيت ماكَلت ليكوم … راه تانقرا انا وتوةَ فنفس ليسي … داكشي علاش كنت تا نطلع ونزل باش نتاقل من ليسي لقديم …

وليت تا نوصلها لدارهوم فسكوتر ديالي… يلا خرجنا فوقت وحدا … حيت هيا تاتقرا فقسم آخر !

ـ ما كرهتكش تكون ديما معايا !

تا انا اودي ما كرهتش لي يونسني … لأغلبية ديال لوقت تانكون بوحدي فدار … حيت ماتانرتاحش عند خالتي … والاكين آش غادي دير … زواج حنا مازال صغار عليه

ـ وقت ما بغيتي دوزي، الدار دارك

ماتخافوش … الشيخ غادي ندور معاه … باش مايبرزتنيش !

ـ آش ظهر ليك فشي فطور نهار السبت ؟

ـ كيفاش زعما نفطرو بجوج عندي فدار

ـ آه، كاين شي مانع ؟

ـ لا، نو بروبليم ! مايكون هير خاطرك ا توةَ ديالي !

معا خوكوم قاتلو لعكَز … درت معا واحد سيدا باش توجد ليا شي فطور ما تايدورش … وباش تجمع شويا الدار … حيت انا

فوضوي … لا ماش الفوضوية ديال دنييل كَران … زعما لانارشيزم … الفوضوية ديالي بوحدها

لموهيم … حتالمرة لخرا ونكمليكوم هاد لحكاية لمروْنة !

بغيت نشاوركوم فواحد لقضية … زعما هاد توة ما تقدرش تخرج ليا علا قرايتي ؟ … حيت خفت نصدق مصيد بحال شي بعضين … ماتعرف لوقت اش تجيب … واخا لوقت هير وحدة قياس !

يوسف بنعدي

 

Billet posté par Zakaria (écrit par Adamito!)

يوسف و توةَ 4

10 septembre, 2007 par Adam Bouhadma, dans Humour. 14 commentaires

سلام عليكم يا ناس،

سمحو ليا تعطلت عليكوم … هاد ليامات ما كاين هير جري عليا نجري عليك … معا خوكوم بغا يبدل ليسي … راكوم عارفين الإدارات ديال لمغرب … الطلوع و لهبوط بلا قياس؛

الموهيم راه توة شفتها … هادشي لي بغيتو تعرفو ؟ … باراكا عليكوم … داكشي لاخور كملوه من راسكوم … باش تا انا نمشي نكمل شغلاتي

ياك ما تييقتو ؟ … ياك كَلت ليكوم ما تبقاوش تيقو دغيا … شحال قاسحين رسيوسكوم … ما تاتسمعوش… الله يهديكوم وخلاص

ايه … آش كنا تا نكَولو ؟ … تلفتوني كَاع … ما عليناش … تلاقيت معا توة ديك مرا ف اكَادير اوفلا

لي ماعرفش اكَادير اوفلا … راه هيا لمدينة لقديما ديال اكَاديرجات ف جبل … مورا زلزال ديال 1960 بقات مهجورا … انا لي تا يعجبني تما هو لمنظر و لكالم … تا يبان ليك من تما كَاع اكَادير و لبحر

ديك نهار تلاقيت معا توة … وشدينا طاكسي لاكَادير اوفلا … بلا ما تسولوني شحال خلصت … داك ثمن تايخلع شويا … والاكين توة تستهل كثر … عرفتو علاش ؟ … حيت توة !! … وا بشاخ

ـ عمرك جيتي هنا آتوة ؟

ـ آه، كنت تانجي معا بابا

واتي كَولي الله يرحمو … إلى كَاع ما بغيتيش تكَوليها … نافقي شويا … راه النفاق هو لي خدام فهاد لبلاد

ـ كي جاك لمنظر ؟

ـ تايحمق، لبحر تايبان زوين من هنا ! ياسلام

واهادي ما بان ليها هير لبحر من كولشي هادشي … وا من كَاع الدّريات لي عرفت … يعني 2 ولا 3 … ماعمرني ما شفت شي وحدا بحال هاكدا … كَولو باز

ـ شوفي داك الجمل، بغيتي نجيبو بيه شي دورا ؟

ـ علاش لا ! ملي كنت صغيرا ماركبت عليه

وا تانتي ما تا تكَوليش لا … وارحميني شويا … راه الصرف قرب إتقادا … كَاليك لمساواة

جا الجمال … هبّط جمل وركبنا … آرسول الله … هاد جمل طويل بزاف

ـ توة

ـ نعام

ـ شدي فيا مزيان باش ما طيحي

انا ماقاد علا شي صداع … الطيحي ليا هنا … وتجي ليا مامك … تبقا تبكي عليا

لموهيم … جبنا دورا فوق داك الجمل … مولاه سمعني تانشعر علا توة بلفرونسي … وصحابو واش انا زماكَري … فاش سولتو بشحال … كَال ليا 50 درهم … واكَاع ماتايمركَ … كون ماشي توة لي معايا … والله ما يدوق عندي تا 20 درهم صحيحة

ـ توة، الى بغيتي نمشيو لداخل ديال الصور، نشوفوه كي داير

ـ واخا، ومن بعد نمشيو للاكورنيش؟

ـ داكور

تنبيه

ينصح عدم قراءة تتمة هذه الحكاية من طرف كل من الاطفال الرضع، اصحاب اللحيات الطويلة و الفوقيات القصيرة و كذلك كل فهاماطور مجلي

لبلوكَ ديال آدميتو و يوسف بنعدي غير مسؤولين عن اي مشكل صحي ناتج عن ذلك، كسكتة قلبية مثلا

ومن لم يحضر في وقت السفر لن تقبل منه شكاية

شديت لتوة فإديها … ومشينا داخل الصور … ملي دخلنا وانا تانقلب علا شي كوان مضركَ … والو … كولشي اوكوبي ـ مشغول …. بقينا تاندورو بينما تخوا شي بلاصا

وامالكوم … واش انا مانبوسش ؟ … راه واخا فيا لفهامات بزاف … راني بحال كَاع دراري … إوا خليوني نضبر على … راسي

لموهيم … كَلسنا فواحد لبلاصا … وقضينا لغراض

نعام … ماسمعتش مزيان … بغيتو تافاصيل ؟ … وخا

آشنو نقدر نكَوليكوم كَاع … ايه … عرفتولالين (ريحة لفم) ديال توة … فيها ريحة لفريز ! … ياك كَلت ليكوم راه توة تاع بصاح ؟

قبل مانمشي … حيت طاجين قرب يتحرق … بغيت نسولكوم … شكون لي عقل علا السمية لحقيقية ديال توة … وبلا نقيل

انا خليتكوم علا خير

رمضان كريم … ما تكتروش من لحريرة و من النفاق … راهوم تايهلكو لمعدة

يتبع : إلى كَالها الله

يوسف بنعدي

Sondage : Youssef Wa Touta !

8 septembre, 2007 par Adam Bouhadma, dans Humour. 16 commentaires

Salut la compagnie

Souhaitez vous que, la chronique de Youssef Wa Touta, dépasse 4 épisodes ?

1 : Oui
2 : Non
3 : J’ai même pas voter aux élections législatives d’hier pour voter ici !

{ Votez par commentaire ! }

J’attends vos opinions !

Merci

Adamito!